Psa 115 | DED | STEP | O KEBU , ge neneac kpac mi miacbesena, kpac. Geng yoac dedzege amma imoc modackecnec nga ge yoac modac modac Kebu, imocac geac kpac kuneng imoc eweheiheigoc kpacbesonga.

Psalms 115

Ge Kebu negensinggena

1 OKEBU, ge neneac kpac mi miacbesena, kpac. Geng yoac dedzege amma imoc modackecnec nga ge yoac modac modac Kebu, imocac geac kpac kuneng imoc eweheiheigoc kpacbesonga. 2 Bangec monnunac ngicngac Anutu mi negemmidae, yeneng deandae, “Yeni Anutungina mong mi hendimbe, kpac.” Yeni nocac ifi deandae? 3 Anutuninango kurumenga kurumenga, imohai kecma songoya modacma uaya mekecde.

4 Ngicngac Anutuac yoac ifi deandae, yeneac nemuongangina siriwa nga golngo memea, yeni bangecngic yeneac marikibisac. 5 Yeni enacbibicnginagoc nga yoac ine naric mi degecde. Yeni kicngina noboc noboc amma wiac naric mi henggecde. 6 Yeni kedzacngina noboc noboc amma wiac mong naric mi negenggecde. Yeni samacnginagoc amma wiac monggac homuna naric mi homunggegecde. 7 Yeni maringinagoc nga maringinango wiac mong naric mi menegenggecde. Yeni haninginagoc nga haninginango sing naric mi kenggecde amma ubanginango udumeng mong naric mi meficgegecde.

8 Ngicngac nemuonga meyunuandae, yeni nemuonga isoc angggec. Nga nemuonga negenserima kecandae, yeni sasawango nemuongangina isocngoc anggecde.

9 O Israe ngicngac, ngeniKEBU negenserima kecbisia, yennoc memeficngina nga kasongina. 10 O Aronggac ama areng, ngeniKEBU negenserima kecbisia, yennoc ngeneac memefic nga kasongina. 11 NgicngacKEBU eweheiheigoc hoanggeandae, ngeniKEBU negenserima kecbisia, yennoc ngeneac memefic nga kasongina.

12 KEBUNGO neneac negenside. Yeng kenecnunuude, ye Israeac ama areng kenecyunuma Aronggac ama areng kenecyunuma 13 ngicngacKEBU eweheiheigoc hoanggeandae amma ngicngac kuneng nga kapia kenecyunuude. 14 KEBUNGO ngeni nga nambaracfocngina mesahengunubeso. 15 KEBU kurumeng nga bangec meficyuruec, yeng kenecngunubeso.

16 Kurumenga kurumenga yeniKEBU yengena ama nga bangec imoc ngicac medacfocngina kecdimbeac nemmeu ihai kecdimbe. 17 Homemea yeniKEBU eriendzong naric mi memigecde, kpac. Ngicngac ningkpe fedae, yeneng ye naric mi dengeregecde, fora. 18 NgaKEBU dengerenide. Neni ye yofinenggac kenehema ^{▼▼Anutungo meficnunuu nenang bangecngicngacnec yumia kecma Anutuac kenecyoac debisina, yoac imoc mitikibiu homac fede nga yeng faka imocac negenu ngereeude. (Fingec fingec 9:26, 14:20, 24:48, Mitiyegec 16:7, 26:12, 103:22 nga goa homac fede.)} kecma nasoya nasoya kenehenide.

KEBU eriendzong memibesonga, hallelu Yac.